Dios nga amahan, nagapasalamat kami nga naga katigum napud kami pag usab karong adlawa ug labaw sa tanan nagapasalamat kami sa mga kaayohan nga among natagamtam sa mga nilabay nga mga adlaw, sa mga grasya ug mga kadaugan nga nadawat ug labaw sa tanan salamat Ginoo sa proteksyon ug pag giya kanamo sa mga nilabay nga mga biyahe. Ania kami nagatigum alang sa paghisgut ug pagplano, pag giya sa among matag-adlaw nga buluhaton kabahin sa among paglawig alang sa pagserbisyo para kaangayan, kalambuan ug kalinaw.

Amahan, himua kami nga maligdong ang matag-usa kanamo, himua kami nga tinubdan o enstruminto ang matag usa kanamo alang sa kaayuhan sa tanan ug hinaut nga dili ang matag usa kanamo maoy tinubdan sa kadaut sa usag-usa kay kani man ang hinungdan sa kaluya ug sa pagdili pagsinabtanay nga musangput sa dili paglambu ug walay kalinaw sa paglihuk diha sa among organisasyon.

Hinaut unta nga istoryahan namo ang mga sayop ug mga problema ug dili kini mahimong hinungdan sa pagbahin-bahin sa grupo nga musangpot sa panagbingkil …

Hinaut unta Ginoo nga dili namo hikalimtan nga kami sa BM lumilihuk alang sa pag-panday sa kalinaw ug hinaut nga magsugod kini sa among tagsa-tagsa nga mga kaugalingon ngadto sa among ginaserbisyohan nga mga komunidad.

Himua kami Ginoo nga ang matag-usa kanamo magminahalay sama sa pagmahal kanimo ug unta ang kada usa kanamo maoy tinubdan sa kalipay, Kusog ug labaw sa tanan maoy instrumento para sa paglambo sa kaugalingon, sa organisasyon ug sa mga katilingban… Nagapasalamat usab kami sa mga sayop ug mga kapakyasan nga mao’y among himuong giya sa among paglawig ug paglambu…

Tultuli kami Ginoo sa matag-adlaw aron mapadayon namo ang among tumong ug tinguha alang sa pag-alagad ug pagpalambu sa mga katawhan ug katilingban nga nanginahanglan sa among pagserbisyo ug hatagi kami sa igong kusog ug grasya aron amo kini nga mapadayon.